Analisti politik, Imer Mushkolaj, thotë se përkundër mesazheve se dialogu duhet të fillojë i pakushtëzuar, ideja për shkëmbime territoriale mbetet.

“Një mesazh që u dha është që dialogu me vazhdu në një farë forme dhe vetë fakti që nuk u përmend shkëmbimi territorial nuk do të thotë që është heq nga agjenda. Pra nuk e shoh si dominim as idenë kundër shkëmbimit territorial apo pro shkëmbimit, më shumë e shoh si triumf idesh që megjithatë dialogu duhet të vazhdoj i pa kushtëzuar. E kur po them i pakushtëzuar, unë e kam kuptuar se nuk duhet me e kushtëzu me heqjen e taksës, vazhdimin e dialogut”, deklaroi Mushkolaj për arbresh.info.

Sipas Mushkolaj, ideja e shkëmbimit territorial ose ndryshimit të kufijve vazhdon me qenë e gjallë. Ai përmend që njerëz të rëndësishëm në SHBA e përkrahin këtë ide.

“Nuk mendoj që në Berlin është mbyll ideja e shkëmbimit territorial dhe kufijve. Ideja vazhdon me qenë gjallë. Mos të harrojmë që në SHBA ka njerëz të rëndësishëm të administratës që e përkrahin këtë ide dhe në Berlin u tha vetëm qëndrimi i dy shteteve të rëndësishme të BE-së, Gjermania dhe Franca. Por, e dimë cili është qëndrimi i SHBA. Pra, në këtë logjikë mendoj që nuk është mbyllur çështja e shkëmbimit të territoreve ose e korrigjimit të kufijve”, vlerësoi ai./arbresh.info/